160527HA15-FT

拍硬檔唔該跟下Beat丫! 「節奏地牢」即將登錄iOS

恆少的頭像

筆者自問算係一個重度機迷,而筆者更加成日同人講識得玩一定玩獨立遊戲(indie game)*1。indie game雖然無啲名廠大作嘅超靚3D畫面,但係就往往有啲你諗都未諗過嘅創意攪作。今次就同大家一隻將節拍遊戲同地下城探險(roguelike)結合埋一齊嘅獨立遊戲「節奏地牢」(Crypt of the NecroDancer)。呢個遊戲2015年推出時已經嬴咗好多個獨立遊戲獎項,唔係筆者吹水,真係睇完trailer已經即刻想玩…

呢個game由加拿大工作室Brace Yourself Games開發,今年被日本遊戲公司Spike收購並推出日本PS4/PSV版,嚟緊仲會有iOS添,不過上市日期就未知。好啦個game到底點玩呢?無論界面定玩法都同「薩爾達傳說」差唔多,玩家控制主人角於地下城探險,操作基本上都只係需要上下左右四個制,使用道具時則要組合接鍵,例如炸彈係下+左,筆者相信有玩過薩爾達嘅朋友應該可以好快上手。最特別係玩家必須要跟住「節奏」嚟入指令,就好大家平時玩音樂game咁要跟住個「beat」,如果唔係就連郁都郁唔到。不過好公平地,喺呢個「節奏地牢」入面,就連敵方怪物都係跟住個beat嚟行動,一路玩一路見到主角同成班怪物喺度跳嚟跳去勁得意。而每一層地下城都會有唔同主題風格嘅音樂,由EDM、Metal去到Deep Blues都有,玩家甚至可以用自己嘅mp3嚟玩,真正音樂同地下城完美結合。

除咗遊戲性夠破格之外,故仔亦都絕對無馬虎,故事講述女主角Cadence個老竇為咗尋找傳說中嘅黃金魯特琴而冒險進入墓穴,結果一去不返。兩年後Cadence為咗搵返老竇,不惜孤身犯險走入地城,但Cadence喺個墓穴掘到一半時,突如其來嘅異變令佢撻入地牢深淵,仲撞親個頭差啲無名。呢個時侯,「死靈舞師」(Necrodancer)搶走咗Cadence個心臟,仲話要Cadence打敗佢啲手下先畀返個心佢。於是Cadence就逼住喺呢個地城展開一場史詩式嘅節拍之旅…到底Cadence可唔可以打敗「死靈舞師」,就要靠大家嘅節奏感啦!想玩英文版嘅朋友可以去steam下載,只係賣緊15usd,即係一舊水左右,抵玩!網址http://store.steampowered.com/app/247080/

*1 獨立遊戲即係指唔係由大公司,而係由一班人或小型工作室開發嘅遊戲,以小品遊戲為主,當然都有例外。

160527HA15-02

隻game實際點玩應該睇trailer快過筆者再多口水。

除左keyboard、手制仲可以用跳舞氈嚟玩!睇人玩隨時仲開心過自己玩。

除左keyboard、手制仲可以用跳舞氈嚟玩!睇人玩隨時仲開心過自己玩。

日版新增「彈丸論破」系列改編音樂,有玩彈丸嘅朋友不妨留意。

日版新增「彈丸論破」系列改編音樂,有玩彈丸嘅朋友不妨留意。

About 恆少

Go!Japan駐日記者,現為網民及二次元住民,但係比起動漫其實更加鍾意打機。

讀者回應