160426TO02-FT

買遮都要講Fashion 吸睛度極高雨遮

TommyKIT的頭像

而家呢個年代,咩都講求時尚,咩都要靚,就連一啲日常用品,就連雨遮亦都變得非常講究。為咗盡量令自己更加突出,對比起其他人有一點點不同,試圖係遮款唔同方面令自己變得特別一啲。踏入夏天,唔少雨遮嘅款式都推陳出新,而家就等小編介紹吓啲特別遮款比大家啦!


1. 「椅子傘」

好多時我地行街行到腳仔軟,總會想搵個地方歇下腳抖下。但係,並唔係度度都會咁啱有張櫈喺面前,想坐又冇得坐,隻腳又痠,條腰又攰,我諗好多人都遇到過類似嘅情況,而呢個時候,呢把遮絕對會派得上用場。呢一把可以座得嘅遮,當做櫈又得,做遮又得,一物兩用,可話係物盡其用嘅最高境界。

160426TO02-01

160426TO02-02

160426TO02-03

遮柄嘅特殊設計幫助承托臀部
圖片來源:NAVERまとめ


2. 「激光LED傘」

相信有睇過星戰嘅人都有幻想過希望可以拎住入面果枝激光劍揮嚟揮去。係,小編當然知道市面上係真係有果把激光劍玩具買嘅,之但係咁,咁大枝激光劍,就算想曬下命但下下帶出街都厭煩啦係咪?而呢把激光劍LED遮就絕對滿足到你嘅需求喇,實用之餘,又不失激光劍嘅帥氣。

激光劍LED遮有紅、藍、綠、紫、淺藍、黃、白七種顏色供隨意轉換,再加兩種閃動模式比你揀。唔好以為LED燈只係可供觀賞之用咁膚淺,如果去鄉郊地區嘅話,一到夜晚入黑冇電筒都咪話唔驚,呢個時候,手邊呢一把激光劍LED遮就可以大派用場喇!

160426TO02-04

160426TO02-05

圖片來源:NAVERまとめ


 3. 「空氣傘」

科技呢家野真係要用「日新月異」黎形容,當你仲用緊扇骨支撐嘅傳統雨遮時,緊貼潮流嘅人已經用緊「空氣傘」喺一邊偷笑你喇。呢把遮,係名副其實嘅「肉眼不能看見的雨傘」,佢係透過吸入空氣,再利用噴出氣流彈走降落嚟嘅雨水,真係好似多啦A夢嘅法寶咁犀利。小編都知就咁講好難明架啦,想知呢把「空氣傘」有幾把閉,睇下下面條片啦!

正如多啦A夢嘅法寶有時都會失靈一樣,呢把「空氣傘」都係會冇電嘅。而家嘅「空氣傘」大概用10分鐘度就會冇電。不過,小編相信,終有一日技術成熟咗,我地就可以長時間用呢把咁劃時代嘅「空氣傘」架喇!

160426TO02-06

160426TO02-07

劃時代商品,嚟自未來世界嘅「空氣傘」
圖片來源:NAVERまとめ


4. 「生菜傘」

呢一把無論小編橫睇掂睇左睇右睇都係生菜嘅生菜,其實……係一把遮黎嘅。真係不得不佩服日本人嘅幽默,特登設計一把幾可亂真嘅生菜遮。摺埋咗唔講嘅話,真係唔會睇得出係一把遮。小編覺得,落雨嘅時候拎呢把遮出街係真係需要一點點嘅勇氣嘅,雖然望多D綠色係好嘅,但呢把遮真係搶fo得好緊要……

160426TO02-08

圖片來源:Tokyo Noble


5. 「空手傘」

所以話識擔遮一定係唔用手搶遮,講緊嘅係呢把採用咗人工學設計嘅遮。透過扣實膊頭同腋下,完全唔需要用雙手去擔遮。,平時長時間擔遮嘅話好易會手痠,而呢把遮嘅先進設計,就算係長時間使用,亦都唔會咁易攰,鍾意嘅仲可以轉吓用另一邊膊頭添。好多時我地因為擔遮而搞到好狼狽,抽野買野唔方便,呢把遮令你可以騰空番雙手出黎,非常貼心。

160426TO02-09

160426TO02-10

擔遮最高境界係唔需要用手嘅~
圖片來源:NAVERまとめ


 6. 「stay-brella」

呢把遮顧名思義,就係可以企係度嘅遮。平時落雨果陣,入到室內,搵唔到可以擺遮嘅地方,有時要焗住放入袋,又或者就咁放喺地下。不過用呢把「Stay-brella」就冇呢個煩惱啦,佢獨特嘅遮柄設計,不單止可以令到把遮唔洗靠牆都能夠垂直站立,更可以同枱角成90度比例,緊緊勾住枱面。另外,放係地下涼乾把遮嘅時候,仲可以固定位置,唔會走咗位。一個遮柄嘅設計解決三個問題,真係方便之極。

160426TO02-11

160426TO02-12

圖片來源:NAVERまとめ


 7. 「自製標記傘」

呢把遮最大唔同嘅地方,就係遮柄前端有個窿,可以畀你掛繩又得,掛行李牌都得,創造屬於自己嘅雨遮標記,一覺唔覺意唔見咗把遮都容易D搵番,仲比多個途徑你展現個人特色添。

160426TO02-13

圖片來源:NAVERまとめ


 8. 「Goggles Umbrella(護目鏡傘)」

一般嘅遮打開後都會呈香菇形狀,而呢把護目鏡遮嘅特別之處係,佢比一般遮高身好多,所以更加可以擋到傾面飛過黎嘅雨水。平時高身遮嘅壞處係,佢好容易會遮擋咗前面,令你睇唔到野,而呢把遮就係前方加咗個護目鏡,令你可以唔洗刻意舉高把遮,都可以睇到前面,而且個護目鏡設計仲頗有玩味添。

160426TO02-15

圖片來源:NAVERまとめ


 9. 「無骨傘」

平時D遮都係需要用傘骨去支撐嘅,但呢一把「無骨遮」就採用咗無骨架設計,成把遮更加輕身之餘,同時亦可以抵擋到強風大雨。而收遮果陣都好方便,只要拉一拉遮柄,就會自動摺埋,設計同外型都非常時尚。

160426TO02-16

160426TO02-17

160426TO02-18

圖片來源:NAVERまとめ


 10. 「UnBRELLA」

平時我地收遮嘅時候,唔多唔小都會被雨遮收起時遮面彈起嘅雨水沾濕。而呢把「UnBRELLA」有向外撐起嘅遮骨設計,收遮嘅時候向外反,咁就唔會被滑落嘅水滴沾濕喇。

160426TO02-19

圖片來源:NAVERまとめ

上面咁多把雨遮各有特色,小編就偏好「空氣傘」多D,貪佢新奇又有趣,真係好似係法寶袋走出黎嘅道具咁。唔知你地又鍾意邊把多D呢?

※資料來源:NAVERまとめ

About TommyKIT

Go!Japan編輯部 新手上路,菜鳥編輯 閒時鐘意睇小說寫文扮文青 其實內心都係一個毒煲劇睇動畫漫畫嘅小宅宅

讀者回應