我諗日本應該係全世界最重視新入職員工嘅國家,因為佢哋嘅研修期真係好~長~呀~

我係阿榮,而家喺日本鄉下地方嘅某間公司做營業,入職個陣真係外國人盲中中咩都唔識,突然咁參加左個入社式、又唔知做咩咁無啦啦落咗工場度開始咗我研修嘅第一日…我諗大家有睇日劇都有少少認知,日本新人嘅研修時期(大概入職頭三個月)係爆炸辛苦,聽講過有人要洗廁所、又話要上山清雜草、又要背公司嗰本幾尺厚既規則。相比呢啲,我只係落工場學習就比較輕鬆(好似係)

但係,公司畀我嘅研修係長達八個月咁長!!

我三月尾入職,工場長同我講第時做營業,但唔識點生產公司產品點得呢?所以我要喺工場學習到十一月,呢八個月入面,我要每個崗位都學識點做。換句話即係咩都要識,而每個崗位都要考一次試,衰左嘅話要重考到你合格為止!即係話可能唔止八個月…工場作業唔係行行企企咁簡單,堅長時間體力勞動架!衰左咪大檸樂!?所以我第一次考個陣仲驚過當年會考!工場長喺隔離睇住我,我已經慌到震騰騰開心心羅拔臣,就好似拆炸彈咁,一步都唔可以出錯,錯咗你就大鑊喇錯…(不斷喺腦中 loop 十萬次)

我博老命小心翼翼咁完成成個步驟!完成咗!然後工場長無交低任何嘢就走咗,我心諗:吓!即係點?玩神秘?跟住佢後面條靚就跑嚟同我講我合格!嘩當我知我合格個陣你知唔知我開心到想圍住日本跑十個圈然後在世界中心呼喚愛!

過關後我就去學第二樣嘢,不過最後因為人事問題,我七月中就停咗工場研修,上寫字樓開始我真正嘅工作。

日本人所以會花咁多時間訓練一個人,某程度係佢哋覺得新人會做得長唔會走,希望佢哋咩都識之餘,同時訓練出新社員對公司歸屬感。相比香港,兩三日啲野就過哂手,邊做邊學,唔太同呢(好似係)…

給大家一張喺香港難啲見到嘅一大片藍天!

分享
一個普通平凡的香港人,二十五歲時決定隻身遠赴日本工作,目前於鄉郊之地努力奮鬥中,所經歷之事被認為有點慘情(好似係)。並非勵志故事,純屬胡言亂語。