松島灣上 偷得浮生半日閒

日本三景之一的松島相信無人不曉,但要真正識玩還是要從海上睇盡奇岩美景。來到松島,指定動作當然是坐觀光船環繞松島灣一周。不過遊船河路線也有3條,若要一次過睇盡所有著名島嶼的面貌,就必定是選「仁王丸路線」。約50分鐘的船程內,囊括了鐘島、仁王島等必睇奇岩怪石,每經過一個島嶼,船上都會一一作廣播解說,又會不時靠近讓乘客以最近距離接觸大自然奧秘。除了「仁王丸路線」,松島遊船河也有另一種玩法,就是先從鹽釜港上船再到松島海岸,此舉亦一樣可以捕捉到大部分離島,如此一來就可以「不走回頭路」地一次過玩盡兩地了!

海蝕岩「仁王島」會在船程中段出現,為不容錯過的松島灣自然鉅作,記緊要拎定相機影相!
環島遊的另一大看點—「鐘島」。因海浪拍打在4洞門上時會發出近似鐘聲的聲響而得名。

岸上同樣好風光

遊船河只算旅程其中一半,皆因松島周邊還有一眾偷閒好去處。像是東北地區最古老的桃山時代建築五大堂,就是被列為國家重要文物之一的松島標誌性建築。散步一輪過後難免會覺得肚餓,此時就可到鄰近的松島魚市場,放肆大吃特吃最新鮮海產。另外車站旁的觀瀾亭亦有提供抹茶和日式點心,放眼窗外回味松島灣撲撲海浪,松島偷閒之旅才叫無憾!

海鮮丼 – 佔盡海岸線地利優勢,漁市場內盡是最新鮮的海產,足料得接近滿瀉!
抹茶點心 – 觀瀾亭曾為專門招待幕府貴賓的茶室,如今則開放予大眾一邊品茶一邊觀景。
相傳只要跨過五大堂門外的朱紅色「透橋」,就能結得美好良緣。

松島環島觀光船
地址:宮城縣宮城郡松島町松島字町内85
電話:022-354-2233
航班時間:9:00am-4:00pm(每小時一班,11月1日至3月19日期間4:00pm航班休航)
定休日:年中無休(惡劣天氣下停航)
收費:觀光船1,500日圓
交通:JR松島海岸站徒步約10分鐘
網頁:http://www.matsushima.or.jp/


零距離接觸 仙台「萌」主貓頭鷹

以為只有東京才有可愛的貓頭鷹Cafe?其實去到仙台都有!今次到訪的Cafe是位於仙台商店街,由仙台地鐵站行過去只要5分鐘,交通十分方便。這裡同時也是仙台首間動物Cafe,裡面不單有超過20隻貓頭鷹,更有小兔、刺蝟、狐獴同普通狨等小動物,只要得到許可及在店員的協助下,就能夠跟牠們作近距離接觸,隻隻都任影唔嬲,無論一家大細定同朋友去一樣好玩!不過玩時玩,愛護動物依然係第一宗旨,一到埗唔好太興奮即刻衝向動物們,首先要坐定定留心聽店員簡介注意事項,之後就可以放心投入治癒的動物小王國啦!順帶一提,Cafe名叫「福郎」,其實跟貓頭鷹的日文同音,而據聞貓頭鷹亦具有喚來幸福的象徵意義,不過計小編話,見到一排「福郎」歡迎自己來臨已經夠晒幸福,每隻的種類及個性不同,但可愛度一樣爆燈!邊個話去商店街只有shopping,這個隱世溫暖後花園絕對值得大家到訪!

想讓貓頭鷹乖乖企在自己手上,首先要告知店員,消毒好雙手後待店員為你戴上皮革手套,之後店員就會帶你所選的貓頭鷹到你手上~
Cafe是「樓上舖」,來到這裡有種寧靜溫馨感覺,令人一時忘記煩憂。
名︰家康 – 見到佢眼神流露出嘅嗰股英氣,就知佢不負名將德川家康之名,不過佢其實好嗲人架。
名︰元就 – 眼仔碌碌好可愛嘅元就,個性亦乖巧文靜,相信好輕易就俘虜到大家嘅心。
名︰壽太郎 – 壽太郎成日都周圍望,好似對每樣事物都充滿好奇,佢嗰對深邃雙眼皮,真係恨死小編喇…..
名︰晴政 – 睇佢個樣好似好cool,其實只係怕生,所以大家都快啲去同佢玩啦!

除咗貓頭鷹,呢度仲有好多活潑好動小動物,好似一入門口就見到普通狨跳跳紮。大家都唔使擔心,基本上佢哋都唔會咬人,但以防萬一都係唔好將隻手擺近佢哋個口度。

矇眼貂十分聰明活潑,小編提提大家,小心佢會趁你唔為意就「捐」去你隻腳度啊!

 可愛精品任你買

一場嚟到動物Cafe,除咗影相又點可以兩手空空就離開?呢度有唔少得意精品等住大家買,帶唔走「福郎」BB們,咁就唯有圓吓啲紀念品留念啦!

仙台福郎環保袋
福郎曲奇
向貓頭鷹求個簽,祈個福都係唔錯嘅選擇!隔離仲有個零食同玩具基金,大家就多多益善少少無拘。
為咗可愛嘅小動物們,大家每次觸摸唔同動物前記得都要消毒!

仙台福郎
地址:仙台市青葉區一番町3-1-24 山一商店大廈4F
電話:022-217-2963
營業時間:平日11:00am-8:00pm、週末10:00am-8:00pm
定休日:不定休
交通:地下鐵仙台站徒步約5分鐘
網址:http://www.fukuroucafe.com/