大家好,我係阿榮。

唔經唔覺,2017年快完結!真係快到好似眨眼咁,仲快過小明。
時光飛逝令我諗起第一次嚟日本旅行原來已經係十年前⋯⋯⋯

嗰陣2007年,係我考會考嗰年,朋友飛咗嚟日本讀書,佢話如果我去日本旅行可以免費供應食宿過我仲同我玩,嘩!!!!!唔係唔去呀嘩????我本身已經好鍾意日本,又未去過,同埋又可以同朋友仔見面,一舉幾得呀!!所以決定咗考完會考就去日本旅行!!!!!

我係第一次出國,仲要係自己一個人!!!嗰陣18歲都未有,而家諗起都覺得緊張刺激~~~~基於我嗰陣仲係學生哥,又冇得做part time,我真係節衣縮食咁儲左成年!!!實際每星期儲咗幾多就唔記得,淨係記得為咗儲錢日日lunch都帶飯,放學直接返屋企唔去玩!!!終於有志者事竟成,畀我出發前儲夠錢,嗰會考又考完,7月頭順利出發~~~自己一個人第一次搭飛機呢啲野都冇咩好講,最特別都係隔離個日本人同我傾計。

第一次旅行,目的地係東京,嗰陣嘅日文程度真係零呀!!!係零呀!!!!!朋友雖然話會陪我玩,但佢有啲日子要返part time,唔得閒陪我嗰陣我就要自己生存,唔識日文都唔算問題,只係做每件事所需嘅時間都要長少少咁,即係明明十秒搞掂嘅事要用五分鐘咁耐!!!

我仲記得嗰次我係間鋪頭想幫嗰朋友買袋,用英文問店員有冇貨,點知佢以為我想去toilet,仲好耐心咁教我點去,可能佢以為外國人問親都係搵廁所…………又有次我係間餐廳想問店員拎張tissue,朋友叫我將啲英文字歪少少音讀嘅話,日本人就會聽得明喇,於是我對住店員讀歪少少嘅英文音,佢畀咗嗰超級大嘅問號我,完全唔明我講咩,嗰一刻我懷疑朋友其實係想玩我!!!!!!!!

雖然嗰陣溝通上係有啲麻煩,但都有好多日本人知我地係外國人唔識講日文而幫我地好多,例如問路問到教埋你去目的地呀,或者用佢地嗰啲聽完都唔明嘅英文盡量同我哋溝通。而家回想當日,我諗嗰陣都冇諗過十年後嘅今日我會係日本住同做野,日文唔係話講得好好但至少識得問人嗰袋仲有冇貨,識得問店員拎tissue!!!時間真係過得太快,十年前喜歡日本嘅心到咗今日,雖然夾雜咗啲複雜嘅心情,但講到底我仲留係日本係因為我仲係好鍾意呢嗰地方嘅人同物。再下一個十年,諗返起今日,又會有咩新感覺呢?

最後給大家一張好耐冇去做遊客,早嗰排做左,仲去咗奈良餵鹿嘅相。

分享
一個普通平凡的香港人,二十五歲時決定隻身遠赴日本工作,目前於鄉郊之地努力奮鬥中,所經歷之事被認為有點慘情(好似係)。並非勵志故事,純屬胡言亂語。