日本曾經推出過唔同濃度抹茶朱古力、抹茶雪糕等甜品,令一眾抹茶控大飽口福!士多啤梨作為另一款熱門口味,又點少得佢?呢個風潮近日漫延到士多啤梨,日本東京有甜品店推出「五級濃度士多啤梨Gelato」,簡直係士多啤梨控嘅福利!

推出呢個超有少女心嘅五級濃度士多啤梨Gelato嘅,就係嚟自日本東京嘅士多啤梨甜品專賣店 いちびこ(ICHIBIKO Strawberry Cafe)!

開幕兩年幾嘅 いちびこ,店裡主打以農場直送士多啤梨所打造嘅甜品,一踏入店內已經聞到香甜又清新嘅士多啤梨香,絕對係士多啤梨控嘅天堂!今次更加碼推出擁有五種唔同濃度嘅士多啤梨 Gelato,顏色深淺度唔同嘅淡粉色系雪糕,實在太有少女心啦!

五款士多啤梨 Gelato 分別有 30% 鮮士多啤梨、60% 鮮士多啤梨、士多啤梨牛奶、士多啤梨乳酪同埋三重莓果味意大利雪糕 ,雪糕顏色嘅深淺根據味道濃淡而分,雪糕質感香滑濃郁,帶有清甜又濃厚嘅士多啤梨香,令人好想通通都試~

士多啤梨控一定唔可以錯過 30% 鮮士多啤梨及 60% 鮮士多啤梨口味嘅皇牌Gelato!雪糕以有「寶石草莓」美譽、嚟自宮城縣嘅ミガキ草莓新鮮打造,品種經過精心培育,鮮紅大粒,清甜多汁,散發獨有嘅酸甜味。每杯雪糕上亦伴隨住一粒鮮士多啤梨,食完一定超滿足!

雖然每杯雪糕都呈現超夢幻粉紅色,但絕對係無使用香料、著色劑嘅天然配色~想試晒咁多種唔同口味嘅可以約埋朋友一齊去試雙球口味,簡直係味蕾嘅極尚享受!

單球雪糕嘅售價係¥545(~HKD$39)、雙球¥650(HKD$46)、三球¥780(HKD$56),單球/雙球 每球加¥150(~HKD$11),三球共加¥1200(HKD$14)~

五級濃度士多啤梨雪糕為ICHIBIKO南町田グランベリーパーク店限定甜品,以呢個價錢食到用日本新鮮士多啤梨整嘅雪糕真係抵!

甜品店ICHIBIKO Strawberry Cafe(いちびこ)亦有各款士多啤梨甜品,包括士多啤梨蛋糕、雪糕芭菲、戚風蛋糕、布甸、卷蛋、泡芙、水果三文治、吐司、刨冰、珍珠奶茶、乳酪等,粉嫩嫩嘅賣相好吸引~

呢間甜品店簡直係士多啤梨控天堂,大家又有冇興趣試試?

ICHIBIKO 南町田グランベリーパーク店
地址:〒194-8589 東京都町田市鶴間3-4-1 グランベリーパーク セントラルコート1F ギャザリングマーケット内
交通:東急田園都市線 南町田グランベリーパーク駅 直結
電話:042-850-5563
營業時間:星期一至四 10am – 8pm|星期五至日及公眾假期 10am – 9pm