日本東京富士山一向係旅遊熱點,最近山梨縣富士河口湖有間麵包店「FUJISAN SHOKUPAN」新開張, 主打每日新鮮出爐嘅富士山麵包,比大家直接將富士山食落肚!麵包用上富士山天然礦泉水、山梨縣産小麦(かいほのか)同朝霧高原牛乳製成,另外更加入山梨縣產巨峰提子汁,帶有天然果香,超適合買嚟做東京手信~

該店提供4種麵包, 包括:富士天然水麵包、豆乳橄欖麵包、提子乾麵包同富士山麵包FUJISAN SHOKUPAN。招牌係同店名相同嘅「FUJISAN SHOKUPAN」,將麵包切開後可以見到有如冠雪富士山嘅橫切面,賣相可愛,超適合打卡!山嘅部分係以巨峰葡萄汁製成,帶嚟上品嘅香甜,此外包裝亦係富士山造型,內外都係富士山嘅感覺。

富士山麵包/FUJISAN SHOKUPAN (¥800;~HKD$57)

主打嘅富士山包有兩隻顏色,分別係經典嘅藍白相間同粉嫩嘅櫻花色,佢地係用天然果汁色素去染色,所以食落口會有陣果汁嘅香味,唔怕食哂啲化學色素落肚!

麵包店今年12月13號先正式開幕,啱啱開幕就立即成為人氣話題,無論係IG定Facebook,你都一定見到佢嘅身影,吸引咗唔少當地人同遊客大排長龍購買。由於反應熱烈,目前每人限買一件。

「FUJISAN SHOKUPAN」店舖位於河口湖站附近,步行4分鐘就到,營業時間為11:00至18:00,每日賣完即止。無論你係去河口湖定係去富士急高原樂園都可以順道前往,一條麵包,可以滿足你影相同食嘅慾望,邊有可能唔買?

食パン専門店「FUJISAN SHOKUPAN」
地址:山梨県南都留郡富士河口湖町船津3462-11
營業時間:星期一至日 11am – 6pm(不定期休息,詳情可瀏覽官網
電話:0555-72-9908
* 麵包售完即止

FB@食パン専門店 FUJISAN SHOKUPAN
IG@fujisan_shokupan