一班同學揀係冬天去日本,就梗係唔少得滑雪行程啦~不過今次佢地就唔係咁好彩,遇上大風雪,但原來就算遇上風雪,去滑雪場都可以以有好多野玩架,最重要係要順應教練嘅指示,下次如果滑雪遇上風雪都唔洗灰心,一樣可以玩得盡興!不過當然,如果情況真係唔許可,教練都反對嘅話,就試都唔好試!

第四日嘅行程由早上九點左右由旅館出發,大約一個鐘車程就到達目的地——五瀨高原滑雪場。滑雪場位於宮崎縣同熊本縣交界嘅高山地區,到達滑雪場嘅時候落緊冷雨,風勢後來逐漸增大,仲變埋做大風雪。雖然天氣不穩,但亦無阻我哋滑雪嘅心情。

我哋更換滑雪裝備後就徐徐坐纜車上山。滑雪場嘅登山纜車係果種只有扶手,雙腳懸空嘅款式,風雪之中大家都捉實扶手唔敢郁,上山途中遇上突如奇來嘅強風仲會令纜車停頓幾十秒至一分鐘,真係又緊張又興奮。到咗山上面,強風雪令我哋企都企唔穩,後來得知當天遇上日本宮崎數十年難得一遇嘅風暴,所以有好多旅行團都取消咗滑雪場嘅預訂。我哋喺山上面只見到另外兩三位遊客,仿如包場。由於強風沒有減弱,教練決定我哋先去進食午餐。出奇地,作為呢個山上滑雪場唯一一間餐廳,料理價錢實惠外亦十分美味,尤其是烏冬及牛肉飯,全部都係一千円有找!有啲同學更無懼寒冷天氣,竟然走去食雪糕!


大約一點左右,我們終於可以走出去外面踏上雪地啦!由於我哋大多數都係初學者,所以我哋分為三組,跟著教練嘗試喺雪地上學習步行同埋用鞋嚟滑雪。大家一個接一個慢慢滑行落山坡,看見同學們由起初腳步蹣跚到動作變得順暢,真係十分佩服、自己都玩得好開心!

可惜過咗一陣,我們就因為暴風雪要暫停。當時能見度非常低,教練就帶我哋改玩雪橇同雪兜。

雪兜有不同玩法,最基本就係兩人一齊坐,一開始因安全起見,較重嘅人坐喺前面。熟練了後,較重嘅人坐喺後面,如此一來,滑行嘅速度提升不少。後來我哋仲發掘出各種千奇百怪嘅滑法,有趴著滑行、亦有獨自坐雪兜。嚟到雪地當然唔少得必玩活動——雪球大戰!最初喺一班教練企喺滑道兩旁,用雪球攻擊滑下來嘅同學,後來排緊隊嘅同學又開始攻擊滑下來嘅同學同埋旁邊嘅教練,大家都玩到笑聲連連、樂而忘返。

三點左右,有幾位學生問教練可唔可以去滑雪。由於所剩時間唔多,風雪又未停止,基於安全考慮,教練不太建議外出滑雪,但見好多同學都係第一次嚟滑雪場,最後同意喺平地俾大家試下。大家紛紛戴上裝備,各自跟教練到雪上練習。
起初,即使係簡單嘅向前滑行都令人覺得十分吃力,途中仲跌倒幾次添,有時甚至會俾強風吹跌,但我們都冇放棄,企起身再嚟過!
雖然我們只能係平地上滑雪,到最後都能夠掌握到些少滑雪技巧,種種嘅體驗同愉快回憶亦令我哋覺得今次風雪中嘅滑雪體驗「值回票價」、不枉此行!
最後,大家回程搭返纜車落山嘅時候,天氣逐漸好轉,我們有幸地觀賞到秋冬嘅山景以及蔚藍嘅天空,為今日嘅行程畫上完美句號。
 *行程由Asian Studies HSUHK 提供